ಆಸೆ

ಅವನನ್ನು ನೋಡಿದಾಗಲಿಂದ,

ಇಷ್ಟು ವರ್ಷಗಳಲ್ಲಿ ಒಮ್ಮೆಯೂ 

ಬರದ ಯೋಚನೆ ಕಾಡುತಿದೆ;

ಮನದಲ್ಲಿ ಒಮ್ಮೆಯೂ

ಮೂಡದ ಆಸೆ ಮೂಡುತಿದೆ;

  ನನಗೂ ಹೀಗೆ ಒಬ್ಬ ಮಗನಿರಬೇಕಿತ್ತು 

ಅವನು

ಅವನು 

ಹನಿಗವನವಾಗಿ ಬಂದು, 

ಕವಿತೆಯಾಗಿ ಮನ ಸೇರಿದ. 

ಧಾರಾವಾಹಿಯಾಗಿ ಕಾಡಿಸಿ,

ನೀಳ್ಗತೆಯಾಗಿ ಆವರಿಸಿದ. 

ಕಾದಂಬರಿಯಾಗಿ ಜೊತೆಗೂಡಿ, 

ಆತ್ಮ ಚರಿತ್ರೆಯಾಗಿ ಹೋದ. 

ಕನ(ನ)ಸು

ಕನ(ನ)ಸು 

ನಿನ್ನ ಕನಸುಗಳನ್ನು ಜೀವಿಸಿ,

ಆಶಿಸಿ, ಹಾತೊರೆದೆ 

ಅವು ನನಸಾಗಲೆಂದು;

ಗೊತ್ತಿರಲಿಲ್ಲ,

ನೀನು ಕನಸುಗಳಲ್ಲೇ 

ಮಾತ್ರ ಜೀವಿಸುವವ,

ಹೊರ ಲೋಕದ

ಅರಿವು ನಿನಗಿಲ್ಲವೆಂದು.

ಕ್ಷಣ ಕ್ಷಣ

ನೀನೊಲಿದ ಆ ಕ್ಷಣದಿಂದ; 

ನೀ ಜೊತೆಗಿರುವ ಈ ಕ್ಷಣದವರೆಗೂ; 

ಮುಂದೆ ನೀನಿಲ್ಲದ ಆ ಕ್ಷಣದಲ್ಲೂ; 

ನಿನ್ನ ಹೆಸರೇ ನನ್ನುಸಿರು ಪ್ರತಿ ಕ್ಷಣದಲೂ. 

ಮಹಲ್

ಇದು ಪ್ರೀತಿ

~~~~ ~~~

ನಾ ಸತ್ತ ಮೇಲೆ ಬೇಡ

ನನಗೊಂದು ತಾಜ್ ಮಹಲ್;

ನಾನು ಮುಮ್ತಾಜ್ ಆಗಲೊಲ್ಲೇ, 

ನಿನ್ನ ಮನಸಿನ ಏಕೈಕ

ಪ್ರೀತಿ ನಾನಾದರೆ ಸಾಕು. 

ಇದು ಜೀವನ

~~~ ~~~~

ನಾ ಸತ್ತ ಮೇಲೆ ಬೇಡ

ನನಗೊಂದು ತಾಜ್ ಮಹಲ್

ನೀ ಸಾಯುವ ಮೊದಲು ಕಟ್ಟಿಸು

  ನನಗೆಂದು ಮೂರಂತಸ್ತಿನ ಮಹಲ್ 

ಚಿತ್ರಕೃಪೆ : ಅಂತರ್ಜಾಲ